غراره العبوس

أبو الرايقة · 03-06-2010, 01:17 AM

غرارة العبوس دار الكمال ونقاص
دوبا حليل ابوي ال للعلوم دراس
ــــــــــــــــــــــــــــــــــــــــــــــ
كتير مننا سمع المناحة دي للاستاذ / محمد الامين
على كل المناحة طويلة لكن المبدع ود الامين اخد منها جزء
تخليدا لذكرى رجل العلم والمعرفة العابد الزاهد الورع التقي النقي الجميل الهميم العجيب الذى اختلف معه بعض اهله وكانوا يشتكونه بالمحكمة بعد ان ياتوا لتناول الزاد معه وياخدوا مصاريف المحكمة ويسالونه انه يرفع يديه لينصرهم الله عليه وهو يفعل كل ذلك ويقربهم اليه وعندما يرسل لهم الهدايا يرسلها لهم بالليل حتى لا يلومهم الناس على عداوته اذا راؤوا تلك الهدايا منه اليهم انه الشيخ / عبد الباقي (ازرق طيبة) لكنك لن تستغرب اذا علمت من اباه فابوه قام احد الناس بقتل ابنه في شيوم والشيوم للشباب الحناكيش هو سيرة العريس عندما يقوم الشباب باخذه لزيارة ضرائح الاولياء وعندما هم ابناءه بقتل الشاب منعهم منه بل اخذه للبيت معهم وقام بتربيته وتعليمه حتى حفظ القرآن الكريم وصار من المشايخ اتدرون من هو والد الشيخ عبد الباقي صاحب المناحة انه الشيخ حمد النيل صاحب المقبرة المعروفة بام درمان .
لا اظن اننا قادرين على هذا العمل ولكن لاجل هذا خلدت ذكراهم ، وهذه دعوة لكل الناس بنشر التسامح بينهم وان يكون ديدنا لهم طالما علمنا انو الدنيا دي اخرها كوم تراب فلا تجعل في قلبك حقد على احد ربما تحتاج يوما لدعوته لك بالرحمة والمغفرة

أبو الرايقة · 03-06-2010, 01:21 AM

معليش يا شباب
ما عرفت انزل الاغنية
غايتو البعرف انزلها معاو

عزة · 03-06-2010, 05:26 AM

يا سلام يا ابو الرايقة،،
اتمني ان تحكي لنا عن طيبة و مشايخها و زوارها بالتفصيل و تأكد انني من اشد المتابعين
و المهتمين سأكون،،
طيبة الشيخ عبد الباقي.. إسم بي هيبتو!

في الجزيرة مكانين نفسي ازورهم كانو طيبة دي و اب حراز،، و كان نفسي ازور كل المشايخ و اشوف و اسمع القصص،،
يلا أحكي..

jox · 03-06-2010, 07:37 AM

شكرا ابو الرايقة
دي اول مرة اعرف فيها المعلومات الجميلة دي وياريت تزيدنا كمان ..

أبو الرايقة · 04-06-2010, 09:58 PM

اقتباس:

المشاركة الأصلية كتبت بواسطة عزة

يا سلام يا ابو الرايقة،،
اتمني ان تحكي لنا عن طيبة و مشايخها و زوارها بالتفصيل و تأكد انني من اشد المتابعين
و المهتمين سأكون،،
طيبة الشيخ عبد الباقي.. إسم بي هيبتو!

في الجزيرة مكانين نفسي ازورهم كانو طيبة دي و اب حراز،، و كان نفسي ازور كل المشايخ و اشوف و اسمع القصص،،
يلا أحكي..

ازيك عزوز كيفك يا غالية
ان شاء الله ح كل البعرفو والقدرت اتحصل عليو من معلومات
وكويس انك جبتي سيرة ابو حراز
عشان المنطقتين مرتبطين بي بعض

أبو الرايقة · 04-06-2010, 10:00 PM

اقتباس:

المشاركة الأصلية كتبت بواسطة jox

شكرا ابو الرايقة
دي اول مرة اعرف فيها المعلومات الجميلة دي وياريت تزيدنا كمان ..

تسلم يا جوكس
الله يخليك يا غالي
ان شاء الله ح ابدا ليكم من وراء خالص
عشان ده تاريخ وجميل كمان

أبو الرايقة · 04-06-2010, 10:17 PM

الغالية عزوز طبعا ذكرت حاجة جميلة ومنطقة رائعة وهي ابو حراز
طبعا منطقة ابو حراز تقع في الناحية الشرقية للنيل الازرق شمال حنتوب
اشتهرت بشجر الحراز سكن بها خمسة اخوان وهم :
حمد وسمي بحمد النيل لكرمه
وعبد الله العركي مؤسس الطريقة القادرية العركية
وأبو ادريس واسمه محمد سارت عليو الكنية
وعمر ولقب بالزير لسعة علمه
واخيرا ابو بكر وسار عليه كنية ابو عشة مع انو لم يتزوج
والله اعلم
هؤلاء الخمسة اخوة سموا بالخمسة العدول
الجميل في الامر وهذا ما يجب ان يفتخر به اهل السودان
ان عبد الله العركي هذا كان جالسا كمفتي على ككر الامام مالك
وككر معناها المقعد ان انه نال مرتبة من العلم حتى سلم اليه مجلس الافتاء على المذهب المالكي هذا على نطاق الدول الاسلامية حيث انه كان يفتي في المدينة المنورة في المسائل التي تصعب على الناس .
ما عايزين نشعب الموضوع ولكن هذه نبذة بسيطة عن ابو حراز اشتهرت بالعلم والعلماء والاولياء ويقال ان بها تسعة وتسعين ولي او قبة لكن بها 17 قبة
لكن قيل ان بها فوق الالف ولي من اولياء الله الصالحين والله اعلم
من اشهرهم الخمسة العدول والشيخ دفع الله المصوبن والشيخ يوسف ابو شرا
وقد فاقت شهرة الشيخ يوسف ابوشرا الافاق
وهو المؤسس الحقيقي لطيبة الشيخ عبد الباقي

jox · 05-06-2010, 10:00 PM

الجميل في الامر وهذا ما يجب ان يفتخر به اهل السودان
ان عبد الله العركي هذا كان جالسا كمفتي على ككر الامام مالك

اها انا واحد من الناس لم افتخر بالحاجة دي لاني كنت ما عارفا يعني جاهل بيها عدييل كده

ابو الرايقة العزيز يا ريت تركز في حكيك الجاي كلو على المعلومة دي البفتكر انها بتحتاج لمساحة اوسع
اتمنى ايضا لو تقدر تصل للشيوخ الحاليين وتصور منهم اي وثائق في ما يتعلق بالشيخ / عبد الله العركي وتنزلا هنا

وشكرا

أبو الرايقة · 06-06-2010, 12:22 AM

شكرا جوكس
تعرف لقيت رابط بيتكلم بي تفصيل بسيط عن الفترة دي
بس انا ح اتذكر جوانب عاجباني في الناس ديل شديد
http://www.alqoum.com/arb/page.php?123

مولى · 06-06-2010, 01:27 AM

ابو الرايقة تسلم على الطرح
كتير بسمع بابو حراز ولى جزور فى طيبة الشيخ عبد الباقى لكن عمرى ماسمعت قصص عن مشايخ المنطقة دى ياريت تواصل

أبو الرايقة · 06-06-2010, 01:43 AM

اقتباس:

المشاركة الأصلية كتبت بواسطة مولى

ابو الرايقة تسلم على الطرح
كتير بسمع بابو حراز ولى جزور فى طيبة الشيخ عبد الباقى لكن عمرى ماسمعت قصص عن مشايخ المنطقة دى ياريت تواصل

يديك العافية
تعرفوا ياشباب كلامكم ده بدفعني عشان اكتب
بس انا ما بحب ادخل الناس في دوامة
بحب اقول حاجة يكون عندها مردود جميل
لكن على كل الكلام بين وطيبة وابو حراز جميل
عشان كان فيهم ناس جميلين شديد
ربنا يرحمنا ويرحمهم جميعا
مولي :
ممكن اعرف جذورك في طيبة ناس منو ؟

أبو الرايقة · 06-06-2010, 04:39 PM

مرور سريع
قيل ان الشيخ عبد الله العركي لما ذهب لمكة افحم جميع العلماء هنالك
حتى انهم بدؤا يسالونه اسئلة عجيبة وهو يرد
مع العلم بان الشيخ عبد الله العركي عندما درس علي يد الشيخ عبد الرحمن بن جابر قيل انه كلفه بمهمة الرعي ، ولم يبدأ معه بالعلم اولا ، الحكمة ربما في الامر تعليمه التواضع والصبر ، فدعا عليه العلماء هناك بمكة وقالوا ليو : علما ما تورثو فقال : يورثوه اولاد ابو ادريس اخوي ومازال ابناء ابو ادريس الى يومنا هذا اهل علم ، خلف الشيخ عبد الله العركي اخوه الشيخ محمد ابو ادريس ثم من بعده ابنه الشيخ دفع الله المصوبن .
عشان نمشي في طريق طيبة درس على يد الشيخ دفع الله اغلب علماء السودان من الشرق للغرب ومن الجنوب للشمال اغلبهم ، وما من شيخ في السودان الا وله صلة بالشيخ دفع الله المصوبن الا قليل ، كان اعلم علماء عصره بلا منازع ، تلقى العلم منه ابن عمه الشيخ عبد الله الطريفي ثم من بعده ابنه الشيخ محمد قنديل الدهب ثم من بعده ابنه الشيخ يوسف ابو شرا ثم من بعده ابنه الشيخ محمد ثم من بعده الشيخ احمد الريح وهؤلاء جميعا بابوحراز عدا الشيخ عبد الله الطريفي فهو بمنطقة في الحجاز تسمى مستورة تقع شمال جدة .بعد الشيخ احمد الريح تولى الشيخ حمد النيل بام درمان وح نقيف شوية في الشيخ حمد النيل .

jox · 06-06-2010, 09:43 PM

قمة الجمال ابو الرايقة

علي طاهر · 07-06-2010, 11:27 AM

يديك العافية يا ابو الرايقة ،،
و متابعين شديد ،،

أبو غسان · 07-06-2010, 01:36 PM

فعلا لازم تكون أبو الرايقه
لأنه كلامك ده كلام زول رااااايق
وكلام مرتب وسمح وبيوضح حاجات الناس فعلا محتاجة تعرفها عن ما خفي من حاجاتنا السمحة
يديك العافية وواصل بالله

أبو الرايقة · 07-06-2010, 02:51 PM

جوكس وابو علوة وابو غسان تسلموا ياشباب ويديكم العافية
الكلام بالمناسبة فيه معاني انسانية جميلة
وده اجمل ما يمكن ان نستنتجو من الشغلانة دي
معليش اخوكم في العربي المرتب داقي في العراضة شديد
بس المهم يوصل المعنى

أبو الرايقة · 07-06-2010, 03:10 PM

نخش على الشيخ حمد النيل صاحب المقابر المشهورة بام درمان
ووالد الشيخ عبد الباقي صاحب المناحة الجرت الموضوع
طبعا الشيخ حمد النيل ما عندو علاقة بي ام درمان هو اصلا من ابو حراز وكان يتنقل بين ابو حراز وطيبة ، ابو حراز كانت المركز ومحل العلم وطيبة كان بلاد ، وبلاد بمعني منطقة زراعة عند اهلنا في الجزيرة ، المهم في الموضوع الزول ده كان قمة في التواضع يعني المرتبة دي ما نالها ساي( الناس ديل سلكوا الطريق الى الله بالصدق ) ده المختصر .
يعني الزول ما بقعد افتي ساي للناس، اي علم عندهم بقولو بطبقو اول شيء عشان الكفة تتوزن.
كان هنالك خلاف بينو وبين الخليفة عبد الله التعايشي وقام الخليفة بسجن الشيخ حمد النيل ومعه بعض الرجال الى ان توفى الى رحمة مولاه بام درمان ودفن بالقرب من النيل في منطقة مجلس الشعب الحالية ( هسي اسمو شنو ما عارف ) وقد طمرت المياه القبر وتم تحويله الى المنطقة المدفون هو فيها الان . الخلاصة من الموضوع ان العبرة بالخواتيم يعني اين الشيخ حمد النيل الان؟ قبره ظاهر يزار وكل الناس عارفنو( ماعلينا ) جميعهم ذهبوا الى رب كريم لا يظلم عنده احد . اخر نقطة قيل ان للشيخ حمد النيل كثير من الابناء واي زول بقول عدد لكن والله اعلم 36 ذكروجميعهم يبدوا بي اسم محمد تيمنا على المصطفى صلى الله عليه وسلم ( يعني محمد عبد الله ) ولكن الشايع يكون عبد الله والله اعلم ، أكبرهم احمد ومحمد وعبد الله ( عشميق )ح نقيف عندو عشان كان ليو دور في مجاعة سنة 6 واشتهر في الاغاني كتير وعبد الباقي والطريفي والعليش ودفع الله ومحمد نور واسحق واسماعيل وغيرهم عليهم الرحمة جميعا .

jox · 15-06-2010, 05:21 PM

انا متقرفص وقاعد

اصحى يا بريش وواصل الحكي

حكيك طاعم وسع مواعينو

أبو الرايقة · 15-06-2010, 05:54 PM

يديك العافية جوكس
تعرف الموضوع اشربك على بعدين انا ما بحب اشتت افكارالناس معاي
وتبقى الشغلانة ما عندها جمادة مفيدة
لكن بقول قصة انا شايفا لذيذة وهي كانت السبب للقصة دي
في منطقة شمال كردفان بالتحديد منطقة تسمى بابيض دير محازية لدار الكبابيش كانت هناك قبيلة من جهينة تسمى العركيين تشتغل بالرعي ( كدي اندفر على العامية ) وهم في رعيهم داك جاهم زول من المغرب عالم من احفاد الامام ابراهيم المجاب بالمغرب اسمو مقبل اها مقبل ده كان عالم وقعد مع الناس ديل فترة طويلة لحدي ما اتخرج على يدو طلاب علم اها قام شيخ القبيلة قال الزول ده ما بنمرقو مننا ساي ، اها اتزوج بنت شيخ القبيلة ولما حملت سافر هو للمغرب عشان يشوف اهلو اها قام رجع تاني واستقبلو ولد صغير يشبهو شبه شديد ، اها عرف طوالي انو ده ولدو ، قبل كده الجماعة ديل لما المراة وضعت الولد احتارو اسمو منو عشان ابوه مافي اخيرا سموه دفع الله يعني دفعو لينا الله لانو جاء من طرف الزول ده حسوا كانو الزول ده كان مرسل ليهم مرسال وكمان جاهم ولد من صلبو قامو سمو بي دفع الله ومن ديك انتشر اسم دفع الله في السودان ، دفع الله ده الان مقبور بالهلالية وهو والد الخمسة العدول المقبورين بابوحراز. ونسب دفع الله الى قبيلة امه بشمال كردفان قبيلة العركيين لكن الزول ده من الاشراف بالمغرب . والله اعلم

jox · 16-06-2010, 07:26 AM

عشميق حبل الوجد

كلامي ده صاح والا انا راكب غلط

ابو الرايقة ما اجمل التاريخ يا صديقي , اقصد التاريخ الذي لم ندرسه حسب المنهج الرسمي \

ثق تماما بانك تساهم في بناء معلوماتنا

وعرج علي عشميق ...

أبو الرايقة · 16-06-2010, 01:16 PM

جوكس يديك العافية
كلامك صاح ونص
وانت نبهتني لي حاجة مهمة جدا عشان عشميق ده كان عندو دور كبير في التاريخ
الغريبة ما جابو ليو سيرة ابدا
ما عارف السبب شنو ؟
عشميق حبل الوجج انا اخوي مقلام الحجج
عمشيق اسمو عبد الله ود الشيخ حمد النيل في ام درمان
وهو خليفة الشيخ حمد النيل بعد وفاته
كان من اكرم كرماء السودان او قول العالم الاسلامي في وقتو
سكينو حمراء وبقولو بضبح الشايل
وهو رسل المؤونة لاهل ام درمان في سنة 6 سنة المجاعة
كان ليو دور كبير هو والشيخ ود بدر
كان احد قواد المهدي وقام بفتح القلابات حسب الروايات المتواترة مع الزاكي طمل
وهو شقيق الشيخ عبد الباقي الاكبر صاحب المناحة
طبعا كان عندو ابنو ليو قصة في قصص الادب الانجليزي القديمة
اسمو محمد محمد ده قتل حيوان مفترس حسب رواية الكاتب الانجليزي وقام الحيوان شال الفروة بتاعت الراس سلخها ليو اها لما ودوه الدكتور قالو ليو نعمل ليك بنج قال للدكتور خيط ساي واي لحمة بترف من جسمي اقطعها دي ما حقتي ... والله اعلم

أبو الرايقة · 21-06-2010, 01:19 PM

تبكيك العيون بي اغزر الدمعات
حكم السيد رضا قبلك محمد مات
ـــــــــــــــــــــــــــــــــــــــــــــــ
ده جزء من قصيدة ود فريجون تلميذ الشيخ عبد الباقي في قصيدته الشهيرة غرارة العبوس دار الكمال ونقاص ، الحديث عن الشيخ عبد الباقي جميل ، قابلت عدد من تلاميذه وسالتهم لماذا لم تاخدوا معلومات اكتر عن الشيخ عبد الباقي ؟ فكانت كل الاجابات واحدة وانا انقلها ليكم زي ما قالوها لي : يا ولدي نحن قايلين الشيخ عبد الباقي بموت ؟ ما كانوا بتخيلوا شكل الحياة بدونوا او انو يجوا يوم وطيبة ويكون الشيخ عبد الباقي لا يوجد فيها ، تعلق عجيب وجميل ومحبة عجيبة ، وصادقة وهو كان يحبهم جدا ويبادلهم الود بالود ، اها انوصف ليكم الزول ده وهو معروف بي ازرق طيبة ولابس الزراق وابوطرقة ، طبعا زمان الناس بلبسوا توب دبلان مع الجلابية بيتلفوا بيو وكان الناس بيختاروا اجود انواع التياب ، وكان توبوا مصنوع من قماش الزراق وهو ارخص التياب ، وكان يقوم بخدمة الضيوف لوحدو الى ان توفاه الله ،
وصفه احد الشعراء :
تعجبني مرقتو بي لفحة زراقو
وتعجبني مهابتو للقاصدين وفاقو
احب لي لماتو واكره لي فراقو
قسم بالله وايمانا عتاق
حرام النار على من زادو ضاقو
لك الرحمة الاستاذ الجليل والمربي الفاضل والشيخ الورع والقدوة الحسنة .

عزة · 28-06-2010, 03:39 PM

mona · 01-07-2010, 01:43 PM

يا الله
دايما المشايخ الصوفية مكانتم جوانا مليئة بالحب والتقدير
لانهم بعكسو سماحة الدين ويسره
قصص جميلة يا ود الشيخ
واصل متابعين معاك

أبو الرايقة · 01-07-2010, 09:06 PM

اقتباس:

المشاركة الأصلية كتبت بواسطة mona

يا الله
دايما المشايخ الصوفية مكانتم جوانا مليئة بالحب والتقدير
لانهم بعكسو سماحة الدين ويسره
قصص جميلة يا ود الشيخ
واصل متابعين معاك

التحية ليك أخت منى
وشكرا على المرور
طبعا الناس ديل بالمناسبة كان ليهم دور كبير في نشر الدين وزرع الأخلاق الحميدة بين الناس وروح الاخاء والمودة والتكافل ،،،،،
ح احاول اجيب مواقف ليها علاقة بالحكمة الكان بتعامل بيها الناس ديل .
( ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ )